Suziria lehertu bezain pronto, Maritxuk Atarrabiako Txistularien doinuekin dantzari ekin zion lehen aldiz 1994ko jaietan. Burlatako Txistulariekin dantzatu ohi zuen ordura arte, eta haiek izan ziren bertako txistulari gazte horiek bultzatu zituztenak herriko txistulari talde bat osatzera.
Geroztik, hainbat hitzordu ditu taldeak Atarrabiarrekin. Dantzari eguna, Atarrabiako Eguna edota Olentzero dira horien adibide. Mikelats dantza taldearekin aritzen dira dantzak jotzen, Atarrabia abesbatzaren ahotsak laguntzen, jaietako arratsaldeak dantzagarriekin girotzen edo erraldoien jira-birak txistuaz areagotzen. Baina zalantzarik gabe, hitzordurik esanguratsuena jaietako azken egunekoa da, eguerdian, plaza jendez lepo dagoelarik.
Txistularien alardea, alegia, datorren urtean hain zuzen ere hogeitabosgarrena ospatuko dutena. Atarrabiarrentzat hain berezia den kontzertu honetan, hainbat musikarirekin oholtza partekatzeko aukera izan dute txistulariek, baita era askotako piezak jotzeko parada ere.
