Berrogeita bat urtetan
egin ezkero atzera
Etxe Beltza Elkarteak
emana zion hasiera
herriko bertze hainbertze
kultur taldekin batera
Atarrabiako eguna
ospatzea zen afera.
Ibilbide emankorra
eginda gaur egunera
kalera irten gaitezen
egun hori ospatzera!
Auzolanean saretu
elkartu (e)ta antolatu,
oinarri finkoak jarri
euskara dadin loratu.
Karrikak kolorez jantzi,
alaitasunez dantzatu,
elkar zaindu, elkar entzun
(e)ta errespetuz jokatu...
Nondik gatozen jakinda
aintzinera begiratu,
badago zer borrokatu
(e)ta badago zer ospatu!
Alaznek (Ituren 1989) etxetik jaso zuen bertsozaletasuna, batez ere aitarengandik eta amatxirengandik. Iturengo bertso eskolan hasi zen 12 urterekin, Doneztebeko bertso eskolan jarraitu eta gaur egun Oronozko bertso eskolan eta Erratzuko bertso eskolan dabil. Ibilbide luze zabala du bai txapelketetan eta bai plazan.
