Miren Amuriza Plaza, Berrizko bertsolari eta idazlea da. Bizkaiko azken sei Bertsolari Txapelketetan aritu izan da bertsotan eta Euskal Herriko Txapelketan 2009tik aurrera.
Bertso: Miren Amuriza Plaza
Gomendatu nahi dizkizuegun bertso hauek 2017ko Euskal Herriko Bertsolari Txapelketa Nagusiko final-laurdenetan bota zituen kartzelako lanean. Hiru bertso eder hauek berak sortutako doinu batean kantatuak dira. Adineko andre bat irudikatzen du protagonistatzat. Perla honen edukiaz eta kantaeraz gozatzea espero dugu.
GAIA: Jendea harri eta zur utziko lukeen argazkia atera berri duzu. Zalantzan zaude gorde edo zabaldu.
Larogehi eta bi urte
gorputz honetan nabari
ditudan arren nahi nuke
askatasunean ari,
eta joan zen astean
gure etxeko bilobari
eskatu nion mobil bat
ekar zezala opari.
Neure gelara sartu naiz
agur esan munduari,
ta ohe gainean utzi
ditut arropa ugari (BIS)
ta argazki bat atera
diot neure buruari.
Nabaritzen da azala
nola aldatu zaidan aldez
nola daukadan bularra
tinkotasunaren galdez
aluan ez dut ilerik
besapeetan bi trabes
ta izterretan barizek
humel hartzen dute babes.
Neure muga bat hautsi dut,
erretratu hau eginez
ta gorputzari begira
liluratua nahiz zinez; (BIS)
niretzat ederra bada
besteentzat zergatik ez.
Orain zalantzan jarri naiz
mobila eskuan dudala,
bidali edo ez bidali
lotu ala ez uhala.
Tira erakuts dezadan
ez bait da izan makala
nahiz ta gure familian
sortuko den arrakala.
Noz e noz hil egingo naiz,
noski tokatzen da hala
ta ez dut nahi esan dezaten
nintzela andre legala, (BIS)
baizik oroitu nazaten
amona ausart bezala.
Bertsoari esteka: https://bertsoa.eus/bertsoak/14713-kartzela-miren-amuriza
