Etxebeltzak bere 45. urteurrena ospatu nahi izan du, eta une hau aprobetxatu bere historia jaso, dokumentatu eta ondorengoei transmitizteko. Orain arte egindako lan eta ibilbide osoari balioa eman nahi izan diogu, merezi duen bultzada eman, eta Etxebeltzak duen nortasuna landu eta mantentzeko.

Etxebeltza sortzeko lan egin zuten lehenengo pertsonek, pala eta pikotxarekin, zentzurik figuratuenean, jende ameslari baina konprometitu askoren ideia guztiei eutsi dieten hormak eraiki zituzten, gutxinaka errealitate bihurtuz joan direnak.

Lortu nahi dugun guztiari bidea ireki dion espazioa da; gizarte euskalduna, abertzalea, feminista, justuagoa, baina batez ere borrokalaria. Uste sendo hori izan da hazten lagundu diguna eta paretak gainditzera eraman gaituena, herri bihurtu gaituena.

Etxebeltzak modu aktiboan parte hartu du Atarrabiako bizitza sozial, politiko eta kulturalean, herri honetan kultura bultzatzeko beharrezkoak eta ezinbestekoak izan diren beste talde batzuekin batera. Horregatik, ezin dugu Etxebeltzaz hitz egin herri honetako kultura bizirik eta indartsu mantetzea eragiten duten talde eta kolektibo horiei buruz hitz egin gabe.

Hasiera-hasieratik, sareak sortu ziren esparru sozio-kultural eta politikoetan, sustraiak errotzea lortu arte. Etxebeltza herri honetako talde kultural eta sozial askoren sorreraren lekuko izan da, eta oso modu estuan egin du lan horiekin guztiekin.

45 urteko ibilbidea ospatzen dugu, erabat kontziente izanik oinarriei esker baino ez dela posible izan, erroei esker. Elkar elikatuz joan diren sustraiei esker, eta horrela Etxebeltzako proiektua haziaraziz herrira iritsi arte. Lerro hauen bidez eskerrak eman nahi dizkiegu proiektu hau aurrera atera duten eta gaur egun bizirik jarraitzea posible egiten duten pertsona guztiei.

Elkarrekin ospatu nahi dugu, hazten eta eraikitzen jarraitzeko gogoarekin, horregatik, Atarrabiako Egunaren edizio berri batekin egitea baino modu hoberik ez zaigu bururatzen.

Harrotasunez ospatuko dugulakoan; Herritik egin, herrian eragin!