Frantziatik maiz heltzen zaizkigu herri mugimenduen oihartzunak: tradizio jakobinoa eta Parisko Komuna, 68ko Maiatza eta erreformistak, langile mugimendua eta Jaka Horiak, iheslarien gordelekua eta gutxituen zapaltzailea... Hori guztia eta gehiago da Frantziako Errepublika. 1789ko eta 1848ko iraultzak iturburu dituen herrian, bizi-bizirik dira protesta sozialak, eta kasuan kasuko Gobernuak gogor erantzun die. Kale itsutik atera nahian, matxinoek askotariko molde eta ereduak atondu dituzte, eztabaidetara eta ekintzetara batzen ari den belaunaldi berriaren bultzadaz: feministak eta antirrazistak, kale istiluak aldirietan eta hirietan, klimaren inguruko mobilizazioak eta, berrikitan, ZAD edo babestu beharreko guneak. Bertan pizten diren borrokak ugariak badira ere, susmoa da urrun geratzen zaizkigula gugandik hain hurbil gertatzen direnak. Horietako bakoitzean mugida orokorrago baten hazia dagoelakoan, Hartzea Lopezek Frantziako eta kolonia frantsesetako herri borroka nagusien artera eramanen gaitu, molde kronologikoan eta unean uneko lekukotasunekin, suteen hautsak nora eta nola barreiatzen diren argitu nahian. Ondare eta esperientzia horien guztien ezagutza gure jarduna elikatzeko baliagarri izanen baita.